Петропавлдағы гір спорты фестиваліне қыздар қатысады
ПЕТРОПАВЛ. ҚазАқпарат - Петропавлда алғаш рет гір спорты фестивалі өтуде, деп хабарлады «ҚазАқпарат» ХАА тілшісі.
Фестивальға Қазақстан, Ресей, Украина, Беларусь өңірлерінен спортшылар келді. Оған әр жастағы, түрлі салмақта 150-ден астам спортшы қатысады.
СҚО-дан 80-ге жуық гір спортшылары келді. Олардың ішінде балалар жасөспірімдер клубы мен жоғары спорт шеберлігі мектебінің тәрбиеленушілері де бар.
«Жарысқа 30-дан астам тәрбиеленушілерім қатысуда, оның ішінде 12-16 келі гірмен өнер көрсететін 20 бойжеткен бар. Соңғы жылдары қыздар көптеп келуде. 8 келіден басталады. Мен де «10 минут гірмен жұлқа тарту» номинациясы бойынша қатысамын», - деді гір спорты бойынша ҚР спорт шебері Сергей Гутевич.
Спортшы өңірде бұл спорт түрі қарқынды дамып келе жатқанын атап өтті. Қазірде 150-ден астам адам бар. Сергей Гутевичтің айтуынша, жыл сайын республика чемпионатында солтүстікқазақстандықтар жеңіске жететін көрінеді.
