Польша Каспийдегі қазақстандық портты пайдалана алады - Нұрсұлтан Назарбаев
ВАРШАВА. ҚазАқпарат - Польша Каспийдегі қазақстандық портты пайдалана алады. Бұл туралы Елбасы Нұрсұлтан Назарбаев Польша Президенті Анджей Дудамен екіжақты келіссөз қорытындысы бойынша бірлескен мәлімдемеде мәлім етті.
«Қазақстан біз айтқан польшалық теңіз порттары және терминалдарын пайдалануға дайын. Сондай-ақ, Польшаның да Каспий теңізіндегі қазақстандық порттарды пайдалануына мүмкіндігі бар»,-деп атап өтті Елбасы.
«Бүгін мен Президент мырзаға ынтымақтастықтың және экспорттың мүмкіндігі жайлы айттым. Біздің Гданьскідегі порт Қазақстан мұнайын қабылдауға дайын»,-деді өз кезегінде Анджей Дуда.
Мемлекет басшысы сондай-ақ ауыл шаруашылығы саласында ықпалдастықтың мүмкіндіктеріне тоқталды. «Бізде ауыл шаруашылығын дамытудың үлкен әлеуеті бар. Польша - ауылшаруашылық өнімдерін сапалы өңдеумен шұғылданатын елдердің бірі. Бұл бізге қажет. Қазақстанда 220 миллион гектар ауыл шаруашылығы жері бар. Оның 25 миллионы егін егуге пайдаланылады. Бұл өнімдердің барлығын өңдеу қажет»,-деп түсіндірді Президент.
«Қорыта айтқанда»,- деді Нұрсұлтан Назарбаев, «Қазақстанда және Польшада әр салада ынтымақтастықты жолға қоюға әлеует жетерлік».
Елбасының айтуынша, ертең Президент Польша Премьер-Министрі Беате Шыдломен де екіжақты қарым-қатынастың нақты мәселелерін талқылайды.
«Менің Польшаға сапарым біздің елдеріміз үшін табысты болатындығына сенемін»,-деп сөзін қорытты Нұрсұлтан Назарбаев.
