Полиция участогына түскен балаға дұрыс қарым-қатынас жасалмайды - Түрме реформасының өкiлi

АСТАНА. ҚазАқпарат - 2014 жылы Қазақстан, Қырғызстан және Тәжiкстан елдерi бойынша кәмелеттiк жасқа толмағандар арасында өткен зерттеуге сүйенсек, полиция участогына түскен балаға жалпы дұрыс қарым-қатынас жасалмайтыны анықталған. Бұл туралы бүгiн тағдыр тәлкегiне түскен балаларды зорлық-зомбылықтан қорғау және олардың құқықтарын сақтау мәселелерi жөнiндегi ортаазиялық диалог барысында Орта Азиядағы Халықаралық түрме реформасының аймақтық директоры Азамат Шәмбiлов мәлiм еттi.

"2014 жылы Қазақстан, Қырғызстан және Тәжiкстан елдерiнде кәмелеттiк жасқа толмағандар арасында өзектi зерттеу өттi. Зерттеу аясында iстi болған кәмелет жасына толмаған 210 бала сұралды. Сауалнамаға қатысқандардың 20%-ы психологиялық тұрғыда қатты қысым көргендерiн, 17%-ы жеңiл-желпi ұрып-соғуға тап болғанын, ал 30%-ы өздерiн қатты ұрып-соққандарын айтқан", - дейдi А.Шәмбiлов.

Оның мәлiметiне сүйенсек, балаларға қатысты зорлық-зомбылық көбiне назардан тыс қалады, бұл заң бұзушылыққа қатысты әрекетсiздiк байқалады. БҰҰ-ның зорлық-зомбылыққа қатысты зерттеуi көрсеткендей, көбiне асырау орындарындағы балалар және сотталған балалар әлi де зорлық-зомбылыққа ұшырап келедi.