Праймериз: Алматы облысында 1108 үміткердің өтініші тіркелді
ТАЛДЫҚОРҒАН. ҚазАқпарат - 17 тамыздан бастау алған «Nur Otan» партиясы ішкіпартиялық іріктеу науқанының тіркеу жұмыстары аяқталды.
Осы ретте, Алматы облысынан 1108 азаматтың өтініші тіркеліп, ендігі кезекте үміткерлер үлкен додаға қатыспақ, - деп хабарлайды ҚазАқпарат тілшісі.
Қатысуға ниет білдірген азаматтардың қатарында 36,4% әйелдер, 35 жасқа дейін 25% жастар құрап отыр. Сонымен қатар, үміткерлер қатарында көпбалалы аналар, қандастар, мүмкіндігі шектеулі жандарда өтінім білдірген.
Қатысушылар ҚР Парламент Мәжілісіне сонымен қатар, облыстық, аудан-қалалық мәслихатқа үміткер болу санаты бойынша праймериз арқылы бағын сынамақ.
Ендігі кезек, үміткерлер үгіт-насихат жұмысымен дайындықтарын пысықтап, партия мүшелерімен кездесулерге, пікір сайысқа қатысады.
Жалпы, праймериз арқылы өңірде 1 мандатқа 3,8 үміткерден айналып отыр. Бұл үлкен бәсекелестікті тудыратыны анық.
Соңғы кезең 1-3 қазан күндері жетісулық 92 мыңнан астам нұротандықтар үміткерлерге өз дауыстарын primaries.kz веб-порталы, мобильді қосымша, дауыс беру учаскелерінде онлайн кабинка немесе бюлеттендер арқылы үміткерлерге өз дауыстарын береді.
