Премьер-Министр 2014 жылдан бастап ішкі нарықтың жанар-жағармайға сұранысын отандық өндіріспен қамтамасыз етуді тапсырды
АСТАНА. Қаңтардың 15-і. ҚазАқпарат /Ернұр Ақанбай/ - Премьер-Министр Кәрім Мәсімов Энергетика және минералдық ресурстар министрлігінің алдына 2014 жылғы қаңтардың 1-нен бастап ішкі нарықтың жанар-жағармайға сұранысын отандық өндірістің өнімдерімен қамтамасыз ету міндетін қойды. Ол бұл тапсырманы аталмыш министрліктің бүгінгі алқа мәжілісінде берді,
деп хабарлайды ҚазАқпарат.
Алқада еліміздегі мұнай өңдейтін үш зауытты жаңғырту өзекті мәселе екенін айтқан Үкімет басшысы: «Екі зауыт бойынша принципті шешім қабылданды. Атырауда жұмыс басталып кетті, Шымкентте жұмысты тездетіп қолға алу қажет. Павлодарда келіссөзге қол жеткіздік. Ендігі міндет мынадай: уәде еткендеріңіздей, 2014 жылғы қаңтардың 1-нен бастап ішкі нарықтың жанар-жағармайға сұранысын отандық өндірістің өнімдерімен қамтамасыз етуге тиіспіз», деді.
Бұл орайда, Премьер-Министр Мемлекет басшысының 2009 жылдың желтоқсанында төменгі октанды жанар-жағармайдың бағасын тұрақтандыру жөніндегі министрлікке берген тапсырмасы орындалғанын жеткізе келе, осылай ілгерілеу керектігін айтты. Бұдан бөлек, Үкімет басшысы қазір жанар-жағармай бағасын тұрақтандыруға қатысты заң жобасы әзірленіп жатқанына тоқталып, оны қазіргі нақтылықты көрсететіндей етіп бейімдеу керектігін атап өтті. «Біз депутаттардан осы үдерістердің барлығын заңдастыруды өтінеміз», деді ол.
Үкімет басшысы жанар-жағармай бағасын тұрақтандыруға қатысты халықтың көңіл-күйі жақсы екенін жеткізді. «Алайда, арқаны кеңге салуға болмайды, сәл босаңсысақ, жағдай күрделеніп кетеді», деді ол.
