Президент Ақтауға түркі әлемінің мәдени астанасы мәртебесінің берілуімен құттықтады
АҚТАУ. KAZINFORM — Мемлекет басшысы Қасым-Жомарт Тоқаев «Ақтау — түркі әлемінің мәдени астанасы» гала-концертінің ашылу салтанатына орай құттықтау хатын жолдады.
Президенттің атынан жолданған хатты Мәдениет және ақпарат министрі Аида Балаева оқыды.
— Сіздерді Ақтау қаласының түркі әлемінің 2025 жылы мәдени астанасы атануымен құттыктаймын. Бұл — Қазақстан үшін ғана емес, барша бауырлас елдер үшін айтулы оқиға. Шежірелі Маңғыстау, қазыналы Үстірт аймағы тұтас түркі өркениетінің ажырамас бөлігі саналады. Киелі өлкеде ұлтымыздың, жалпы түркі дүниесінің сан ғасырлық рухани мұрасы сақталған. Тарихы тамырлас, дәстүрі сабақтас халықтардың ынтымақтастығын одан әрі нығайту — баршамыздың ортақ міндетіміз. Осы атаулы жылда бауырластығымызды бекемдей түсетін басқосулар ұйымдастырылып, маңызды шешімдер қабылданады деп сенемін. Түркі мемлекеттерінің ықпалдастығын арттыруға зор үлес қосып жүрген ТҮРКСОЙ ұйымына және осы іс-шараны ұйымдастырушыларға шынайы ризашылығымды білдіремін. Түбі бір түркі жұртының бірлігі нығая берсін. Баршаңызға бақ-береке, толайым табыс тілеймін, — делінген Мемлекет басшысының құттықтау хатында.
Еске сала кетейік, бұған дейін Ақтаудағы ауқымды гала-концерт басталғанын жазған едік.
