Президент елде салынып жатқан жолдар туралы айтты
ПАВЛОДАР. ҚазАқпарат - Павлодардағы Ертіс өңірінің экономикасын жетілдіруге дамыған көлік, логистика желісі ықпал етеді, деп хабарлайды ҚазАқпарат тілшісі.
«Теміржол, автомобиль жолдарын не үшін салып жатырмыз? Себебі, транспорт - бұл өмір. Біз салған жолдарды шөберелеріміз пайдаланып, естеріне алатын болады. Біз немістер салған жолымен сүйсініп жүріп жүрміз, ал оны Конрад Аденауэр соғыстан кейін салған», - деді Қазақстан Президенті Нұрсұлтан Назарбаев Павлодар облысын әлеуметтік-экономикалық дамыту қорытындысы бойынша өткен жиында.
Сондай-ақ, Мемлекет басшысы Франсиско Франко салдыртып, қазірге дейін қолданылып жатқан Испания автомагистальдарының сапасын мысалға келтірді.
«Инфрақұрылым барлығы үшін қажет, шекара маңындағы сауда үшін де (...). Ресейдің 3 облысымен көршілес жатырсыздар, бұл өңірді, Қазақстанды дамытуға көмектесуі тиіс», - деп атап өтті Елбасы.
