Президент Жолдауы ел дамуының негізгі бағыттарын анықтайды-Жұлдызай Салыбекова
КӨКШЕТАУ. ҚазАқпарат - Ақмола облысы Ақкөл аудандық мәслихатының хатшысы Жұлдызай Салыбекова Президенттің «халық бірлігі және жүйелі реформалар – ел өркендеуінің берік негізі» атты Қазақстан халқына Жолдауы бүгінгі сын-қатерлерге дер кезінде берілген жауап болды және біздің қоғамның барлық негізгі салаларындағы мемлекеттік саясатты айқындайды деп есептейді, деп хабарлайды ҚазАқпарат тілшісі.
Ол Президенттің аудан әкімдерінің тікелей таңдауын енгізу туралы тапсырмасына қуанғанын атап өтті. Бұл халыққа қарай жасалған маңызды қадам.
«Әр түрлі деңгейдегі басшылардың құрғақ есептерінің орнына тәуелсіз әлеуметтік сауалнамалардың түбегейлі жаңа институтын елемеуге болмайды. Мәслихаттар аталған институтты жүзеге асыруда негізгі рөл атқара алады деп ойлаймын, өйткені олар халық қалаулылары ретінде мемлекеттік аппараттың ашықтығы мен тиімділігіне аса мүдделі», - деді Жұлдызай Салыбекова.
Аудандық мәслихат хатшысы бюджеттік үдерістерді жеңілдетуге байланысты тапсырмалар үлкен қызығушылық тудыратынын атап өтті.
«Мәслихат депутаты ретінде, жергілікті өзін - өзі басқаруға тікелей қатысы бар, күн сайын көтерілген мәселелерге тап болатын адам ретінде Президентіміз Қасым-Жомарт Кемелұлы Тоқаевтың бастамаларын толық қолдаймын. Ақкөл аудандық мәслихат депутаттарының атынан Президенттің Қазақстан халқына Жолдауында айтылған тапсырмаларды іске асыруға бәріміз белсене атсалысатынымызға сендіре аламын», - деп түйіндеді спикер.
Еске сала кетейік, Қасым-Жомарт Тоқаев Парламенттің екі палатасының бірлескен отырысында Қазақстан халқына жыл сайынғы Жолдауын жариялаған болатын. Жолдауда Президент еліміздің әлеуметтік-экономикалық дамуының алдағы кезеңге арналған басым мақсаттарын жария етті.
