Президенттікке кандидат М. Дуамбеков мемлекеттік тілді меңгергендігін дәлелдеді

АНА. 9 ақпан. ҚазАқпарат /Айдар Оспаналиев/ - Президенттікке кандидат Мұсағали Дуамбеков Президенттікке кандидаттардың мемлекеттік тілді еркін меңгергендігін анықтау жөніндегі лингвистикалық комиссияның сынынан сүрінбей өтті.

Лингвистикалық комиссияның төрағасы Мырзатай Жолдасбековтың айтуынша, М. Дуамбеков екі беттен кем емес шығарма жазуда ойын сауатты жеткізді. Сөйлем құрауы да дұрыс. «Назар аударатын мәселе - шығармада тыныс белгілеріне қатысты және орфографиялық қателер кездесті. Соған қарамастан, кандидат жазба жұмысын жақсы жазды деп бағаланып отыр. Ал емтиханның екінші кезеңі, яғни мәтін оқуда М. Дуамбеков Мағжан Жұмабаевтың 3 өлеңін де жақсы оқыды. Көпшілік алдында да талапқа сай сөйлеп, өзінің ойын анық жеткізе алды. Әрине, мұнда да аздаған кемшіліктер болды. Соған қарамастан, ол өзінің мемлекеттік тілді жетік меңгергендігін көрсетті», - деді комиссия төрағасы.