Процессуалды шешімдер қабылдау үшін құқық қорғау органдарына 620-дан астам материал бағытталды - Қаржы министрлігі
АСТАНА. ҚазАқпарат - 5850 лауазымды тұлғаның тәртіптік жауапкершілігі қаралды. Бұл туралы бүгін ҚР Қаржы министрлігінің алқа мәжілісінде ҚР Премьер-Министрінің орынбасары, ведомство басшысы Бақыт Сұлтанов мәлім етті.
«Өткен жылы 579 млрд. теңгеге бюджеттік заңнама мен мемлекеттік сатып алу тәртібінің бұзылғандығы анықталды. Оның көлемі 552,9 млрд. теңгені құрады. Процессуалды шешімдер қабылдау үшін құқық қорғау орагандарына 620-дан астам материал бағытталды»,-деді министр.
Осы орайда 2 мыңнан астам әкімшілік айыппұлдар салынған екен.
Б.Сұлтановтың сөзіне қарағанда, 5850 лауазымды тұлғаның тәртіптік жауапкершілігі қаралып, соттарға бюджетке өтеу, мемлекеттік сатып алулар бойынша келісімдерді жарамсыз деп тану туралы 490-ға жуық талап-арыз ұсынылды. Осы тұрғыда қабылданған шаралар аясында негізсіз шығыстарды өндіріп алу, әкімшілік айыппұлдар мен өзге де шараларлың арқасында бюджетке 2 млрд. теңгеден астам қаржының түсімі қамтамасыз етілді. Бұдан бөлек, 131,6 млрд. теңге көлемінде мемлекет активтерінің орны толтырылды.
