«Прогресс М-26М» «ғарыш кемелерінің қорымына» тасталады

АСТАНА. ҚазАқпарат - Халықаралық ғарыш стансасының құрамында тиісті уақыт жұмыс істеген «Прогресс М-26М» кемесі стансадан ажыратылып, орбитадан шығарылып, Тынық мұхитының кеме жүрмейтін ауданында суға батырылады, деп хабарлады ресейлік Ұшуларды басқару орталығының өкілі.

«Қызметін өтеген жабдықтар және экипаждың өмір тіршілігінің қалдықтары тиелген кеме ХҒС-дан жергілікті уақыт бойынша сағат 13:18-де ажыратылады. Сағат 16:28-де қозғалтқыштары тежеліп, одан кейін «Прогресс» Жер атмосферасының тығыз қабаттарына кіреді. Ғарыш кемесінің өртелмеген бөліктерін Тынық мұхитындағы кеме жүрмейтін аудандағы суға түсіру сағат 17:17-де жүргізіледі», - деп хабарлады РИА Новости агенттігіне ҰБО-нан.

Байқоңырдан 17 ақпан күні ұшырылған «Прогресс М-26М» жүк кемесі бұған дейін ХҒС экипажына отын, оттегі, азық-түлік, ғылыми тәжірибелерге арналған аппаратура және ғарышкерлер мен астронавттар үшін сәлем-сауқаттар жеткізген.