Прокурорлардың ықпал етуімен 10 мың қылмыскер лайықты жазаларына кесілді
Бұл туралы бүгін Астанада прокуратура органдарының бірінші жартыжылдықтағы жұмысының қорытындысына арналған алқа мәжілісте ҚР Бас прокуроры Асхат Дауылбаев мәлім етті.
«Бірінші жартыжылдықта соттарда 20 мыңнан астам - қылмыстық, 43 мың - азаматтық және 96 мың әкімшілік істердің қаралуына прокурорлар қатысты. Прокурорлар тарапынан мемлекеттік айыптауды тиімді қолдану нәтижесінде лайықты жазасына 10 мың қылмыскер кесілді»,-деді Бас прокурор А. Дауылбаев.
Прокурорлардың қарсылығы бойынша 613 тұлғаға қатысты үкім, сондай-ақ 900-ден астам сот актілері заңға сай келтірілді. Мұнымен қоса, прокурорлардың аралсуынан кейін мемлекет кірісіне 2 млрд. теңгеден астам қаржыны тәркілеу туралы сот шешімдері орындалды. Оның сөзіне қарағанда, 104 мыңнан астам азамат көмек іздеп, прокуратура органдарына жүгінген.
