«Протон» құлаған жерге тақау елді-мекен аумағынан гептил табылған жоқ - Н.Қаппаров

АСТАНА. 10 шілде. ҚазАқпарат - «Байқоңырда» «Протон» зымыран тасымалдағышы құлаған жерге тақау орналасқан елді-мекендердің топырағында және ауада гептилдің ұйғарымды концентрациясының шекті деңгейден артуы орын алған жоқ. Бұл туралы бүгін «Байқоңыр» кешені бойынша Үкіметаралық ресейлік-қазақстандық комиссия жанынан құрылған жұмыс комиссиясының отырысында ҚР Қоршаған ортаны қорғау министрі Нұрлан Қаппаров мәлім етті.

Министрдің атап өтуінше, зымыран тасымалдағыш құлаған жер Ресей Федерациясы жалға алған аумақта, 81 мен 200-ші алаң аралығында жатыр. Зымыран құлағаннан кейін таяу аралықта орналасқан елді-мекендердің топырағы мен ауасынан сынама алынған. Зертханалық сараптама барысында гептил табылаған жоқ.

Еске салсақ, ДМ-03 үдеткіш блогы және «Глонасс-М» үш ресейлік навигациялық ғарыш аппараты бар «Протон-М» зымыран-тасығышы 2 шілде күні жергілікті уақыт бойынша сағат 08.38-де «Байқоңыр» ғарыш айлағының №81 алаңынан ұшырылымы жоспарланған болатын. «Протон-М» зымыран-тасығышы ұшырылымның 10 секундында жерге құлап, жарылды. Апат ұшыру алаңынан 2-3 шақырым жерде орын алды.