Психологтар адамның жеке өміріндегі бақытсыздықтың сырын ашты
АСТАНА. ҚазАқпарат - АҚШ психологтарының зерттеуіне қарағанда, жеке өмірдегі сәтсіздіктер (өмірлік серігін дұрыс таңдай алмауы, жалғыздық) адамның отбасы мүшелерімен өзара қарым-қатынасына байланысты екен.
Сарапшылар 15 жыл бойы 2970 жасөспірім туралы мәліметтерді жинақтаған. Осы уақыт ішінде бұл бозбалалар мен бойжеткендер ержетіп, отбасын құрған.
Атап айтқанда, ерте жасынан ата-анасымен түсіністікте болған балалардың отбасылық өмірінде ешқандай проблема байқалмаған. Ал балалық шағында ата-анасымен сыйластық болмағандардың жеке отбасында да қарым-қатынас қиын қалыптасқан.
Психологтардың пайымынша, ата-анасы мен жасөспірімдер арасындағы қарым-қатынастың бейбіт немесе желікпелі болуы балаларының 15 жылдан кейінгі өмірінде де олардың романтикалық қатынастарының сәтті қалыптасуына ықпал етеді.
Осы орайда, мамандар балалық шақта адам ата-анасымен қалай сыйласып үйренсе, ол өзге адамдармен қатынастарда өзін солай көреді деп түсіндіреді. Яғни, адамдар романтикалық қарым-қатынастарын жас кезінде қалыптасқан сана-сезіммен құрады және оны өзгертуге қауқарсыздық танытады, деп жазады Росбалт.
