Пуэрто-Рико аруы мұсылмандарды ғайбаттағаны үшін атағынан айырылды
АСТАНА. ҚазАқпарат - Пуэрто-Рико мемлекетінің аруы Дестини Велез мұсылмандар жайлы айтқан негізсіз пікірі үшін атағынан айырылып қалды. Ол белгілі американдық кинорежиссер Майкл Мурдың Твиттер парақшасындағы жазбаға қатысты білдірген пікірі үшін осылай жазаланып отыр, деп хабарлайды muslim.kz.
Белгілі кинорежиссер Майкл Мур өзінің Твиттер парақшасында атышулы исламофбо Дональд Трамптың ғимаратының қасында түскен суретін қойып, астына «Біз бәріміз - мұсылманбыз» деп жазған болатын.
Неге екені белгісіз, бұл сурет Велездің қытығына тисе керек. Сурет астына ол «мұсылмандар Америка конституциясын АҚШ-та террорлық әрекеттер жасауға пайдаланып отыр» деген пікір қалдырған.
Ал, «Пуэрто-Рико аруы» сайысын ұйымдастырушылар Дестини Велездің бұл қылығына көз жұмып қарай алмаған көрінеді. Олар бірден Велезді атағынан айырып, бұндай мәлімдемелердің ұйым көзқарасына қайшы екенін айтып отыр.
