Путин мен Лукашенко Қазақстан Президентіне көңіл айтты
Ресей Федерациясы мен Беларусь президенттері Қарағанды облысындағы шахтада болған қайғылы оқиғаға байланысты Қасым-Жомарт Тоқаевқа көңіл айтты, деп хабарлайды Kazinform.
Ресей президенті Владимир Путин Қасым-Жомарт Тоқаевқа Қарағанды облысындағы көмір шахтасындағы 33 адам қаза тапқан апатқа байланысты көңіл айтты.
«Қаза болған кеншілердің отбасыларына көңіл айтып, қолдау білдіретінімізді жеткізуіңізді сұраймын. Жер астында қалған шахтерлер құтқарылады деп үміттенеміз», - деп жазды ТАСС агенттігі.
Беларусь президенті Александр Лукашенко да Қазақстан президентіне көңіл айту жеделхатын жолдады.
«Беларусь Республикасы Қазақстанның Қарағанды облысындағы көмір шахтасында болған апат салдарынан адамдардың қайғылы қазасы туралы хабарды күйзеле қабылдады. Беларусь халқы қазақстандықтармен бірге басқа түскен қиындық пен орны толмас қазаның қайғысын бөліседі», - деп жазды Беларустің Белта агенттігі.
