Путин өз ізбасарының «жас, бірақ кемел» адам болуы керектігін мәлімдеді
АСТАНА. ҚазАқпарат - Ресей президенті Владимир Путин Блумберг агенттігіне берген сұхбатта 2018 жылғы президент сайлауына қатысу туралы нақты шешім қабылдамағанын мәлімдеді. Сонымен бірге, Путин өз ізбасарының қандай болуы керектігін сипаттап берді.
«Қазір біз парламенттік сайлаулар алдында тұрмыз. Осы сайлауларды өткізіп, нәтижесіне қарау керек. Тіпті одан кейін де алдымызда екі жыл уақыт бар. Сондықтан, бұл туралы әңгімелесуге әлі ерте. Білесіз бе, заманауи, мың құбылатын әлемде бұл туралы әңгімелесу тіпті зиян», - деп Путиннің сөзін келтірді Би-би-си Орыс қызметі.
Егер Путин жаңа сайлау додасына түспеуді ұйғарса, оның орнына ізбасары президенттікке үміткер болады. Путиннің айтуынша, ол «өте жас, бірақ өте кемел» адам болуы тиіс.
Сонымен бірге, президент өзінің болуы ықтимал ізбасарына Ресей дамуы жайлы өз көзқарасын ұқтыруға тырысатынын айтты.
Және Путин жақында ғана қатарынан бірнеше аймақтың басшылығына арнайы қызмет өкілдерінің тағайындалуына қатысты пікір білдірді. Ол арнайы қызмет өкілдерінің елдегі лауазымды қызметке тағайындалуынан еш әбестік көріп тұрған жоқ.
