Путин «Сириус» мектебі туралы: Қазақстанда дарынды балалар көп
АСТАНА. KAZINFORM – Ресей Президенті Владимир Путин Петербург халықаралық экономикалық форумында талантты балаларды анықтап, қолдауға бағытталған «Сириус» білім беру жүйесіне тоқталып, Қазақстанда дарынды балалардың көп екенін айтты.
Оның сөзінше, Қазақстан мен Ресей арасында білім беру саласындағы ынтымақтастыққа қызығушылық жоғары.
— Білім беру саласындағы жетістіктерді одан әрі дамытуға қызығушылық зор. Бұл Қазақстандағы білім беру жүйесінің дамуына да, Ресейдегі білім саласында қалыптасып жатқан жаңа үрдістерге де қатысты, — деді Владимир Путин Қазақстан Президенті телерадиокешенінің бас директоры Раушан Қажыбаева қойған сұраққа жауап беру кезінде.
Ресей Президенті Қазақстанға мемлекеттік сапары барысында Мемлекет басшысы Қасым-Жомарт Тоқаевпен бірге «Сириус» жүйесінің іске қосылуына қатысқанын еске салды.
— Естеріңізде болса, біз Қазақстан Президентімен бірге «Сириус» жүйесінің жұмысын бастадық. Бұл жоба өзінің тиімділігін дәлелдеп, талантты балаларды анықтау мен қолдаудың нәтижелі тәсілдерін қалыптастырды. Әрине, Қазақстанда талантты балалар көп. Ең бастысы — олардың қабілетін дамытуға жағдай жасау. Біздің осы бағыттағы ынтымақтастығымыз соған арналмақ, — деді Владимир Путин.
Айта кетейік, бұған дейін Астанада Қазақстан — Сириус халықаралық білім беру орталығы құрылысының басталуына арналған капсула салу рәсімі өткен болатын.
