Qazaq Bank акционері Бақыт Ибрагимнің өліміне қатысты іс жабылды

АЛМАТЫ. KAZINFORM - Қазақстандық кәсіпкер, Qazaq Bank-тің бұрынғы акционері Бақыт Ибрагимнің өліміне қатысты қылмыстық іс тоқтатылды. Бұл туралы Алматы полиция департаментінен мәлім етті.

Аталған дерек бойынша Алмалы аудандық полиция басқармасы ҚР ҚК-нің 105-бабы 1-бөлігімен сотқа дейінгі тергеп-тексерудің бірыңғай тізіліміне тіркелген қылмыстық іс аясында тергеу амалдарын жүргізді. Тиісті сараптамалық зерттеулер тағайындалды.

«Жүргізілген тергеу іс-шаралар кешенінің қорытындысы бойынша ҚР ҚК-нің 35-бабы 1-бөлігі 2-тармағы негізінде қылмыстық іс тоқтатылды. Бұл шешімді Алматы қаласы Алмалы ауданының прокуратурасы бекітті»,- деп хабарлады ведомстводан.

Осыған дейін, Алматыда Qazaq Bank-тің бұрынғы акционері Бақыт Ибрагимнің денесі табылғаны туралы жазған едік.

Еске салайық, 2018 жылы халықаралық іздеу жарияланған Бақыт Ибрагим Германиядан экстрадицияланған болатын. Ол «Bank RBK» АҚ-нан аса ірі көлемде ақшалай қаражатты алаяқтық жолмен жымқырды деген күдікке ілінген болатын.