«Реалды» ірі есеппен ұтқан «Барселона» Испания суперкубогын жеңіп алды
АСТАНА. KAZINFORM — Джидда қаласында (Сауд Арабиясы) футболдан Испания суперкубогы үшін каталониялық «Барселона» мен мадридтік «Реал» командалары жасыл алаңға шықты.
Атақты қос клубтың кездесуі төрткүл дүниенің назарын аударды деуге болады.
Есепті 5-минутта италиялық Карло Анчелотти жаттықтыратын «Реалдан» бразилиялық Винисиустың пасынан кейін франциялық Килиан Мбаппе ашты.
Бұдан кейін алаңдағы жағдай «Барселонаның» (бас бапкері, германиялық Ханс-Дитер Флик) пайдасына соншалықты күрт өзгереді деп ешкім ойламаған шығар. 22-минутта поляк Роберт Левандовскиден пас алған Испанияның жарық жұлдызы Ламин Ямаль таразы басын теңестірді. 36-минутта Р.Левандовски пенальтиді дәл орындады — 2:1.
Арада үш минутта бразилиялық Рафинья шеберлік танытты. Ал бірінші тайм соңында Родригоның қателігінен кейін Ямаль мен Рафиньяның көмегімен Бальде есепті 4:1-ге жеткізді.
Екінші кезеңде 48-минутта Рафинья тағы бір голдың авторы атанды.
Алайда 56-минутта К.Мбаппеге қарсы ойын тәртібін бұзған «Барселона» қақпашысы, поляк Войцех Щенсны алаңнан қуылып, оның орнына испаниялық Иньяки Пенья тұрды.
Родриго 60-минутта айып добын мүлтіксіз орындады — 2:5. Бірақ «Реал» қанша тырысқанымен, есеп ойын соңына дейін өзгерген жоқ.
Өткен жылы суперкубок үшін шайқаста мадридтік клуб 4:1 есебімен ұтса, «Барселона» биыл соның есесін қайырды.
Еске сала кетейік, бұдан бұрын Бақтиер Зайнутдиновтің командасы сырт алаңда «Ризерспормен» тең түскенін жазған болатынбыз.
