Референдум ойдағыдай өтті деген алғашқы қорытынды жасауға болады - алматылық байқаушы

АЛМАТЫ. ҚазАқпарат - Алматыда сайлау процесі тиісті деңгейде өтіп жатыр. Бұл туралы өңірлік коммуникациялар қызметінің брифингінде Алматы қаласы бойынша байқаушылардың капитаны, «Қоғамдық жоба» қоғамдық бірлестігінің директоры Александр Братенков айтты, деп хабарлайды ҚазАқпарат тілшісі.

Спикердің айтуынша, референдум жоғары деңгейде ұйымдастырылып, халық белсенді қатысып жатыр. Ол сондай-ақ бүгінгі сайлау процессі жайлы өз ойын бөлісті.

«Сайлау процесінің тоғыз сағаты өткен соң елімізде референдум өтті деген алғашқы қорытынды жасауға болады. Адамдар келіп, референдум өткізуге қолдау көрсетті. Екінші қорытынды - Алматы қаласы электоралды ұйқыдан оянды десе болады. Себебі, біздің мәлімет бойынша кей аудандарда учаскеге халықтың 30%-дан астамы келіп, дауыс берген», - деді А.Братенков.

Сондай-ақ ол бір учаскеде комиссия мүшелерінің бір адамның екі бюллетенді алғанына назар аудармағанын, аталмыш заңбұзушылықты тәуелсіз бақылаушылар актілегенін мәлімдеді.

Сөз соңында Александр Братенков Алатау ауданы тұрғындарының электоралды белсенділігін атап өтті.