Ресейде бір тәулікте 41 мыңға жуық адам коронавирус жұқтырған
МӘСКЕУ. ТАСС-ҚазАқпарат – Ресейде бір тәулікте коронавирус жұқтырудың расталған жағдайларының саны 40 993-ке жетті, жалпы саны – 8 513 790. Бұл – пандемия басталғалы тіркелген жаңа максимум, деп хабарлайды ҚазАқпарат ТАСС агенттігіне сілтеме жасап.
Бұл жайында аурумен күрес жөніндегі жедел штабтың жексенбі күнгі мәліметінде көрсетілген.
Салыстырмалы түрде ауру жұқтырушылар санының өсімі 0,48%-ды құрады.
Штаб хабарламасы бойынша, қазіргі уақытта ем қабылдап жатқан пациенттер саны - 916 713 адам.
Бір тәулікте 27 115 ресейлік сауығып шыққан.
Емделіп шыққандардың жалпы саны 7 358 539 адамға жетті.
Штаб мәліметтеріне сәйкес, сауығып шыққан пациенттер үлесі ауру жұқтырғандардың жалпы санынан 86,4%-ға дейін төмендеген.
Ресейде бір тәулікте коронавирустан 1 158 адам көз жұмған.
Бір күн бұрын олардың саны 1 160 болған.
Қайтыс болғандардың жалпы саны 238 538 адамға жетті.
