Ресейде зерттеу аясында 6-11 жастағы балалар коронавирусқа қарсы егіледі

МӘСКЕУ. ҚазАқпарат – Ресейде зерттеулер аясында 6-11 жастағы балаларды коронавирусқа қарсы вакциналау жүргізіледі. Бұл туралы Гамалея атындағы орталық директоры Александр Гинцбург мәлім етті, деп хабарлайды ҚазАқпарат ТАСС агенттігіне сілтеме жасап.

«Коронавирусқа қарсы вакцинаны клиникалық зерттеу үшін 6-7 маусымда стационарға балалар ата-аналарымен бірге ерікті түрде жатқызылады. Бұл үш күнге созылады. Демек, 9-10 маусымда вакцина салу жоспарланған», - деді ол.

РФ Денсаулық сақтау министрлігі 24 қаңтарда 6 жастан 11 жасқа дейінгі балаларға Гамалея атындағы орталық әзірлеген коронавирусқа қарсы вакцинаға клиникалық зерттеулер жүргізуді мақұлдады. Александр Гинцбург зерттеу үш жарым айға созылуы мүмкін екенін атап өтті.