Ресейдегі халықаралық байқауда қазақстандық жас музыкант бас жүлдені жеңіп алды
АЛМАТЫ. Сәуірдің 8-і. ҚазАқпарат /Ерлік Ержанұлы/ - Ресейдің Новокузнецк қаласында өткен жас музыканттар арасындағы халықаралық байқауда А. Жұбанов атындағы дарынды балаларға арналған қазақ орта мамандандырылған музыка мектеп-интернатының оқушысы бас жүлдені жеңіп алды,
деп хабарлайды ҚазАқпарат.
Биыл тұңғыш рет өтіп отырған бұл сайыс ТМД елдеріндегі музыка мектептерінің талантты импровизаторлары мен композиторлары арасында өтті. 14-пен 18 жас аралығындағы жас музыканттары арасындағы бұл байқаудың басты ерекшелігі - онда үміткерлер дайын музыканы емес, өз өнерлерін ортаға салды. Оған Ахмет Жұбанов атындағы өнер ордасынан үш оқушы қатысты. Тартысты өткен өнер сайысында 60-қа жуық талапкердің арасынан 12-шы сынып оқушысы Нұрасыл Нуридин «Композиция» және «Импровизация» аталымдары бойынша екі бірдей бас бәйгені олжалады. Ал 11-ші сынып оқушысы Қайрат Тұрсынбеков «Импровизация» атылымында 3-ші орын алса, 10-шы сынып оқушысы Дархан Төлеев дипломант атанып қайтты.
