Ресейдегі өрт сөндіру-құтқару спорты бойынша жарыста Қазақстан құрамасы III орынға ие болды

АСТАНА. ҚазАқпарат - Өрт сөндіру-құтқару спорты бойынша ҚР ерлер және әйелдер ұлттық құрамалары «Достық» Кубогі мен «Золотая штурмовка» сыйлығының жарыстарына қатысты. Чернобыль апатының салдарын жою күнінің 30 жылдығына арналған шара Ресей Федерациясының Ногинск және Подольск қалаларында өтті. Бұл туралы ҚР ІІМ ТЖК ресми өкілі Руслан Иманқұлов мәлім етті.

Жарыс төрт жаттығу бойынша өтті.

Ерлер мен әйелдер арасындағы жарыстарға 5 ұлттық құрама қатысты. Олар Беларусь Республикасының, Болгария Республикасының, Қазақстан Республикасының, Корея Республикасының және Ресей Федерациясының командалары. 

Сонымен қатар аталған спорттық шараға Ресейдің ТЖМ бас басқармалары мен оқу мекемелерінің 9 ерлер және 5 әйелдер командасы қатысты.

Жарыс қорытындысы бойынша өрт сөндіру-құтқару спорты бойынша ҚР ерлер және әйелдер құрамалары жалпыкомандалық III орынға ие болды.