Ресейден келе жатқан жүк пойызының цистернасынан химиялық заттың төгілу фактісі тіркелді - Қызылорда облысы
АСТАНА. Ақпанның 24-і. ҚазАқпарат - Қызылорда облысының Аралқұм стансысында, Ресей Федерациясынан келе жатқан жүк пойызының цистернасынан флотореагентоксал де аталатын химиялық заттың төгілгені анықталды,
деп хабарлайды Қазақстанның Төтенше жағдайлар министрлігі.
Құтқарушылардың мәліметтері бойынша, Ресейдің Химическая стансысында тиелген химиялық зат Өзбекстанның Ахангаран стансысына, Алмалық кен-металлургиялық комбинатына әкетіліп бара жатқан. Күзетке алынған цистерна қазір Қазалы теміржолстансысының тұйықжолында, арнайы алаңда тұр. Сұйықтың төгілу себебі анықталуда, төңіректегілерге ешқандай қауіп жоқ.
Флотореагентокасал химиялық затының түрлері сыр-бояу өнеркәсібінде, резеңке бұйымдар мен үлдір материалдары үшін пласификаторлар дайындауда, сулы негіздегі бұрғылау еріткіштерінің құрылымдық-механикалық және сүлгіштік қасиеттерін реттеу үшін мұнай ұңғыларын бұрғылау кезінде мұнай өнеркәсібінде пайдаланылады.
