Ресейлік отбасы «Самара-Шымкент» трассасында баласын жоғалтып алды
НҰР-СҰЛТАН. ҚазАқпарат – Қызылорда облысында трассада ұмыт қалған ресейлік бала отбасына қайтарылды. Бұл туралы ҚазАқпарат ҚР Ішкі істер министрлігінің Polisia.kz сайтына сілтеме жасап хабарлайды.
Шиелі аудандық полиция бөліміне Ш. Қодаманов ауылы маңындағы трассадан табылған бала туралы ақпарат келіп түскен. Түн ішінде жалғыз жүрген 9 жасар баланы Самара-Шымкент тасжолының 1957-1907 шақырымында Сунақ ата кенті мен Қызылорда облысының 19-шы бөлімшесі маңында патрульдік полицейлер байқаған.
Олар баланы Шиелі аудандық полиция бөліміне жеткізіп, қалай адасқанын сұрастырған және бірден ата-анасын іздестіру жұмыстарын бастаған.
«Тексеру барысында 9 жасар жеткіншек ата-анасымен бірге сапарлап келе жатқаны белгілі болды. Жол бойында көлік тұраққа тоқтаған және ата-ана көліктен түскен. Сол сәтте автокөліктің артқы орындығында ұйықтап жатқан бала оянып, сыртқа шыққан. Ата-анасы оны байқамай, көлікті оталдырып, сапарын жалғастырған. Қызметкерлер шұғыл түрде сұр түсті Lada-Vesta көліктерін тоқтатуға тапсырма берді. Жедел-іздестіру әрекетінің арқасында көлік тұрақтарының бірінен баланың ата-анасы табылды. Полицейлер келгенде ғана ата-ана баласының көліктен түсіп қалғанын байқаған», - делінген хабарламада.
Әңгіме барысында олардың Ресей азаматтары екендігі және Тәжікстанға бара жатқаны белгілі болды. Олар баламен туыстығын растайтын барлық қажетті құжаттарды көрсетті. Ата-ана полицияға жедел әрекет еткендері үшін және ұлының өмірін сақтап қалғаны үшін алғыс айтты.
