Респонденттердің 90 пайызы жыл сайын скринингілік тексеруден өтуге әзір - сауалнама
Cауалнамаға қатысқандардың 90 пайызы жыл сайын медициналық тексеруден өтіп тұруға ниетті екендерін білдірген. Оның ішінде, 76 пайызы «өз денсаулығының жағдайын біліп отырғысы келсе», 14 пайызы - тегін болғандықтан, медициналық тексеруден өтуге әзір.
Ал 10 пайызы медициналық тексеруден өтуге құлықсыз екендерін айтып отыр.
Қазақстанда Ұлттық скринингілік бағдарлама 2011-2015 жылдарға арналған «Саламатты Қазақстан» бағдарламасының бір бағыты ретінде ағымдағы жылдың басында қолға алынған болатын.
Денсаулық сақтау министрлігінің мәліметі бойынша, 2011 жылдың 9 айында 2 миллионнан астам ересек азамат скринингілік тексеруден өткен.
«Премьер-Министрдің сайтында жаңа сауалнама жүргізілуде. «Бизнестің жол картасы-2020» бағдарламасына арналған бөлімге кіріп, «Өз ісіңізді ашуға дайынсыз ба?» деген сауалға өз пікірлеріңізді білдірулеріңізге болады», - деп хабар таратыпты ҚР Премьер-Министрінің PM.kz ресми сайты.