Республикалық бюджеттен бөлінген 207 млн теңге тиімсіз жұмсалған – Аудиторлық палата

АСТАНА. KAZINFORM — Жоғары аудиторлық палатаның нұсқамасы бойынша жылумен, сумен жабдықтау және су бұру жүйелерінің құрылысын жаңғырту кезіндегі бюджет қаражатын ұтымсыз жұмсау тоқтатылды. 

Осы салаға аудит жүргізу барысында мынадай заң бұзу анықталған. 

— 2023-2024 жылдары сенім білдірілген агенттің шығындары шеңберінде бюджет қаражатынан талдамалық көрсетілетін қызметтерге ақы төленген. Ал бұл Құрылыс және тұрғын үй-коммуналдық шаруашылық істері комитеті мен «Қазақстандық тұрғы үй-коммуналдық шаруашылықты жаңғырту және дамыту орталығы» АҚ-ның тікелей функционалы. Жалпы 2 жыл ішінде 207 млн теңгеден астам қаражат жұмсалған. Жоғары аудиторлық палатаның тапсырмасын орындау шеңберінде жылумен, сумен жабдықтау және су бұру жүйелерінің құрылысын жаңғыртуға республикалық бюджеттен шығыстарды қалыптастыру кезінде 2025 жылдан бастап аталған қызметтер үшін қаржыландыру бөлінбейді, — делінген Жоғары аудиторлық палатаның хабарламасында.

Сонымен қатар 2024 жылға арналған бюджетті түзету кезінде 84,4 млн теңге үнемделді. Бұл қаражат мемлекет қазынасына қайтарылды.

Мемлекеттік аудит қорытындылары бойынша басқа да тапсырмалардың орындалуы Жоғары аудиторлық палатаның бақылауында болады.

Айта кетелік Әлихан Смайылов Президентке есеп берген кезде бюджетке 135 млрд теңге қайтарылғаны туралы айтқан еді.