Республикамызда тұмау мен дем алу вирустық инфекциялармен ауыруға байланысты эпидемиологиялық жағдай тұрақты - Денсаулық сақтау министрлігі
АСТАНА. 11 ақпан. ҚазАқпарат - ҚР Денсаулық сақтау министрлігінің Мемлекеттік санитарлық-эпидемологиялық қадағалау комитеті хабарлап отырғандай, республикамызда тұмау мен дем алу вирустық инфекциялармен ауыруға байланысты эпидемиологиялық жағдай тұрақты.
Өткен жылдың осы кезеңімен салыстырғанда тұмау мен дем алу вирустық инфекциялармен ауыратындардың саны 1,4 есе азайып отыр (559 889 оқиға, оның ішінде тұмау - 240).
Денсаулық сақтау министрлігінің 2010 жылғы 15 қыркүйектегі бұйрығына сәйкес тұмаумен ауыратындардың материалдарына зертханалық анықтау жүргізу Астана мен Алматы қалаларының, облыстардың санитарлық-эпидемиологиялық зерттеу орталықтарына жүктелген. Материалды қорытынды тексеруден өткізу «Санитарлық-эпидемиологиялық сараптама және мониторинг ғылыми-тәжірибелік орталығы» РМКК Ұлттық референс-зертханасына жүктеліпті.
Астанадан Н1N1 тұмауы бар деген күдікпен жіберілген 11 сынау материалы (2010 жылы 9, 2011 жылы 2 факті) расталған жоқ. Комитет тарапынан республикамызда тұрғындар арасында тұмау мен өткір дем алу инфекцияларының алдын алуға бағытталған жоспарлы кешенді шаралар жалғасуда.
