Республикамыздың мектепке дейінгі ұйымдарында 100 орынға орта есеппен 104,9 баладан келеді
АСТАНА. 17 мамыр. ҚазАқпарат /Қанат Мәметқазыұлы/ - 2010 жылы республикада 4781 тұрақты мектепке дейінгі ұйымдар жұмыс істеді.
Оларда 390,8 мың бала (49 пайыз қыздар және 51 пайыз ұлдар) оқыды және тәрбиеленді. Аталмыш нысандардағы 3 және одан үлкен жастағы балалар 84,1 пайызды құрады. Тұрақты мектепке дейінгі ұйымдардың жалпы санынан 4 471-і немесе 93,5 пайызы мемлекеттік ұйымдар болып табылады. Ондағы контингентінің саны - 362,1 мың бала (92,7 пайыз). Бұл туралы ҚазАқпарат Статистика агенттігіне сілтеме жасап хабарлайды.
Агенттік мәліметіне сүйенсек, 2009 жылмен салыстырғанда 2010 жылы еліміздегі осы санаттағы ұйымдар саны 2 929 бірлікке (2,6 есеге), ал балалар саны 111,7 мыңға (1,4 есеге) көбейді. Республика бойынша 100 орынға орта есеппен 104,9 баладан келеді. Қалалық жерлерде осы көрсеткіш - 111, ауылдық жерде 94,9 баланы құрады. «Мектепке дейінгі ұйымдардың жалпы санынан 4 609 немесе 96,4 пайызы - жалпы мақсаттағы ұйымдар. 81 ұйым (1,7 пайыз) - шипажайлық, 53 (1,1 пайыз) - арнаулы мақсаттағылар болып табылады. Жалпы мақсаттағы ұйымдарда 375,9 мың бала (немесе жалпы тәрбиеленушілердің санынан 96,2 пайызы), шипажайлық - 7,1 мың бала (1,8 пайыз), арнаулы - 7,8 мың бала (2,0 пайыз) тәрбиеленді», - делінген агенттіктің таратқан баспасөз айғағында.
