Римдегі Колизей жұмысшы мерт болғаннан кейін ішінара жабылды
АСТАНА. KAZINFORM- Римдегі Колизей 23 қыркүйекте жұмысшының қаза табуына байланысты аза тұту белгісі ретінде келушілер үшін ішінара жабылды, деп хабарлайды БЕЛТА.
RomaToday басылымының мәліметінше, қайғылы оқиға 22 қыркүйектен 23 қыркүйекке қараған түні болған. 22 жастағы жұмысшы Андреа Моретти жаңа жарықтандыру жүйесін орнату жұмыстары кезінде шамамен 10 метр биіктіктен құлап кеткен.
Оқиға Колизейдің екінші деңгейінде түнгі сағат 00:30 шамасында болған.
Оқиға орнына Рим карабинерлерінің Орталық бөлімінің қызметкерлері, Еңбек инспекциясының өкілдері және жергілікті денсаулық сақтау басқармасының мамандары келген.
Рим прокуратурасы өндірістегі жазатайым оқиғаға қатысты тергеу бастады. Абайсызда адам өліміне әкеп соққан іс бойынша қылмыстық іс қозғалды. Оқиғаның себептері анықталып жатыр.
Италия премьер-министрі Джорджа Мелони жұмысшының қаза болуына байланысты көңіл айтты.
Колизейдің жаңа бірыңғай жарықтандыру жүйесін қазан айында іске қосу жоспарланған болатын.
Бұған дейін Римнің 2036 немесе 2040 жылғы Олимпиада ойындарын өткізуге өтінім беруге дайындалып жатқаны хабарланды.
