Рудныйда базарға «бомба қойған» 34 жастағы ер адам екі жылға сотталды
ҚОСТАНАЙ.ҚазАқпарат – Рудный қаласында «бомба» қойылғаны туралы жалған хабарлама таратқан ер адам сотталды, деп хабарлайды ҚазАқпарат облыстық полиция департаментінің баспасөз қызметіне сілтеме жасап.
Бұған дейін хабарлағанымыздай , 2020 жылғы 17 наурызда полицияға Октябрьдің 50 жылдығы көшесіндегі «Бак-Бак» базарына «бомба» қойылғаны туралы аноним хабарлама түскен. Тергеу амалдарын жүргізу барысында осы ақпарат тексерілді.
Жарылғыш зат табылған жоқ. Жедел-іздестіру іс-шараларының нәтижесінде, полиция қызметкерлері жалған хабар таратқан 34 жастағы ер адамды анықтады.
Жалған ақпарат таратқан ер адамға қатысты сот 11 маусымда өтті.
«Рудный қалалық соты Қылмыстық кодекстің 273-бабы бойынша айыпталған 35 жастағы жергілікті тұрғынға қатысты үкім шығарды. Сот оған 2 жыл мерзімге бас бостандығынан айыру жазасын тағайындады. Сонымен қатар, ер адам арнайы қызметтердің күш-құралдарын жалған шақырғаны үшін материалдық шығынды толық өтеді» делінген полицияның ақпаратында.
