«Рөлде отырып ұйықтап кеткен»: Абай облысында жүргізуші жүк көлігіне соғылып, жыраға құлады

Абай облысында көлік тізгіндеп келе жатып ұйықтап кеткен ер адам жол апатына себепкер болды, деп хабарлайды Kazinform.

Облыстық Полиция департаменті баспасөз қызметінің мәліметіне сүйенсек, жол-көлік оқиғасы 9 қаңтарда республикалық маңызы бар «Омбы-Майқапшағай» тасжолының 659 шақырымында болған.

«Көлік тізгіндеп келе жатып ұйықтап кеткен «Lada Granta» көлігінің жүргізушісі жүк көлігімен соқтығысты. Жол апатынан кейін жеңіл көлік жыраға құлаған. Абырой болғанда, ешкім зардап шеккен жоқ», - делінген ақпаратта.

30 жастағы ер адамға қатысты әкімшілік хаттама толтырылды.

Еске салсақ, осыған дейін «Өскемен-Семей» тасжолында жол апатынан 2 адам көз жұмғаны хабарланған.