Сабаққа барғысы келмеген оқушы екі күн қатарынан «мектепте бомба бар» деп хабарлаған
ҚАРАҒАНДЫ. KAZINFORM — Қарағандыдағы мектептердің бірінде дарылғыш зат бар деген жалған ақпарат таратқан бала анықталды. Оның ата-анасы әкімшілік жауапкершілікке тартылады.
— Қарағанды облысында құқық қорғау органдары Ы.Алтынсарин атындағы мектеп-лицейде жарылғыш құрылғы орнатылғаны туралы екі рет жалған ақпарат берген кәмелетке толмаған оқушыға қатысты қылмыстық іс қозғады, — деп хабарлады Қарағанды облысы ПД баспасөз қызметі.
Қоңыраулар диспетчерге 2 және 3 қыркүйекте түскен.
Өзін мектеп оқушысы деп таныстырған бала төтенше жағдайлар департаментінің кезекші бөліміне хабарласып, оқу орнында бомба бар деп мәлімдеген.
Тексеру барысында ақпарат расталмаған.
Жедел-іздестіру іс-шаралары нәтижесінде Қарағанды облысы полиция департаментінің экстремизмге қарсы іс-қимыл басқармасының қызметкерлері мектеп-лицейдің кәмелетке толмаған оқушысының жалған терроризмге қатысы бар екенін анықтады.
Ұсталған баланың айтуынша, ол сабаққа барғысы келмеген соң осындай қадамға барған.
— Баланың ата-анасы әкімшілік жауапкершілікке тартылды. Тергеу әрекеттері жалғасып жатыр. Аталған жағдай мұндай «әзілдің» орынсыз екенін және жасөспірімдердің әрекетін бақылау қажеттігін көрсетеді, — деп қосты полиция департаментінен.
