Садыр Жапаров ШЫҰ-ның серіктес елдерін Ұйымның қаржылық құрылымдарына тартуды ұсынды

Садыр Жапаров
Фото: Аkorda.kz

АСТАНА. KAZINFORM – «ШЫҰ+» кездесуі ШЫҰ елдері мен серіктес ұйымдар арасындағы терең өзара іс-қимылдың тиімді алаңына айналады. Бұл туралы елордадағы Тәуелсіздік сарайында Шанхай ынтымақтастық ұйымы саммиті аясында өткен “ШЫҰ+” кездесуінде Қырғыз Республикасының Президенті Садыр Жапаров айтты.

«Қырғыз Республикасы диалог бойынша серіктестермен экономикалық және гуманитарлық өлшемдердегі өзара іс-қимылды күшейту мәселесіне айрықша мән береді. Бүгінгі күннің басты міндеті — сауда, инвестиция, банк ісі, көлік, энергетика, сондай-ақ мәдени-гуманитарлық, оның ішінде туризм мен білім беру салаларындағы бірлескен жобаларды жүзеге асыруға серіктестерімізді белсенді тарту», — деді Қырғыз басшысы.

Осы ретте ол қазір жобаларды қаржылық қолдау үшін ШЫҰ Даму банкі мен ШЫҰ Даму қорын құру жұмыстары жүргізіліп жатқанын айтты.

«Болашақта диалог бойынша серіктестерімізді осы құрылымдардың қызметіне тарту мүмкіндігін қарастырған жөн деп санаймын. „ШЫҰ+“ кездесуінің мұндай форматы ШЫҰ елдері мен серіктес ұйымдар арасындағы терең өзара іс-қимылдың тиімді алаңына айналатынына сенімдімін», — деді Садыр Жапаров.

Соңғы жаңалықтар
telegram