Сағын Өмірбайұлы «Славян базарының» балалар байқауында екінші орын алды
АСТАНА. KAZINFORM — Өткен бейсенбіде Беларусь елінде «Витебсктегі славян базары» ХХХІІІ халықаралық өнер фестивалінің ашылуы өтті.
Фестивальді ашқан Беларусь Президенті Александр Лукашенко «Славян базары» Ресейден Үндістанға, Қытайдан Колумбияға дейін 40-тан астам елдің ой-мақсаты ортақ өнерлі азаматтарының басын қосқанын атап өтті.
«Бүгінде бұл фестиваль әртүрлі ұлттың, діндер мен мәдениет өкілдерінің — авангардтан классикаға дейінгі талғамы кең өнердің шынайы білгірлерінің басын біріктіреді. Бірақ, ең бастысы, бұл — нағыз отбасылық мерекеге, дәстүрлі құндылықтар мерекесіне айналып отыр», — деді Беларусь басшысы.
Ашылу салтанатында ХХІІ Халықаралық «Витебск» балалар музыкалық байқауының жеңімпазы анықталып, 139 ұпай жинаған өзбекстандық Ясмина Хусниддинова топ жарды.
Қазақстан өкілі Сағын Өмірбайұлы жеңімпаздан бір ұпай кем алып, екінші орынды иеленді. Ол қазақтың халық әні «Екі жиренді» орындады.
Ән байқауына 10-нан астам елден барлығы 14 бала қатысқанын атап өткен жөн.
Ашылу күні фестиваль сахнасында Беларусь, Ресей және Испанияның танымал әртістері өнерін паш етті. Концертте Славян базары тарихында алғаш рет Оңтүстік Африка Республикасының өкілдері төбе көрсетті.
Фестиваль аясындағы алғашқы шаралар 5 шілдеде басталды. Осы уақыт ішінде Витебскіде бірқатар ауқымды іс-шара өтеді: көрмелер, қойылымдар, танымал орындаушылардың жеке концерттері, марш шерулері және т. б.
12 шілде, жұма күні Шанхай ынтымақтастық ұйымына мүше елдердің ұлттық мәдениеттер күні болып жарияланды.
Бұл күні ШЫҰ-ға мүше мемлекеттер өкілдерінің қатысуымен «Мәдениеттер диалогы — ШЫҰ елдері халықтарының бірлігінің факторы» тақырыбында дөңгелек үстел өтеді.
Сенбі күні Витебск жазғы амфитеатрының сахнасында 15 елден келген таланттар арасында Алматы қаласы әкімінің эстрадалық-симфониялық оркестрінің әншісі, «Витебск-2024» XXXIII халықаралық эстрадалық ән орындаушылар байқауы өтеді.
«Жас қанат» байқауының Гран-при иегері Ерназар Жұбан өнер көрсетеді.
Жексенбі, 14 шілдеде мәдени форум келесі жылға дейін жұмысын аяқтайды.
