Сағынтаев зияткерлік меншік құқығын қорғайтын сот құру мәселесін талқылады

АСТАНА. ҚазАқпарат - Бүгін ҚР Премьер-Министрі Бақытжан Сағынтаев Инвестициялық ахуалды жақсарту жөніндегі кеңестің кезекті отырысын өткізді. Бұл туралы PrimeMinister.kz сайтында хабарланды.

Кеңес барысында қатысушылар ҚР-дағы зияткерлік меншік құқықтарын қорғау және күшейту мәселелерін, тауар белгілерін пайдалану ережелерін бұзу проблемаларын, сондай-ақ контрафактілі өнім пайда болған кезде туындайтын тәуекелдерді талқылады.

Бұдан өзге, Қазақстанда зияткерлік меншік бойынша мамандандырылған сот құру перспективаларын, сондай-ақ зияткерлік меншік құқықтарын қорғау деңгейінің экономиканы цифрлық трансформациялауға әсері талқыланды.

ҚР Премьер-Министрінің төрағалығымен Инвестициялық ахуалды жақсарту жөніндегі кеңес 2012 жылғы 1 наурыздағы Үкімет Қаулысымен елдегі инвестициялық ахуалды жақсартуға байланысты жүйелі мәселелерді шешу үшін құрылды. Кеңестің негізгі мақсаттары отандық және шетел инвестицияларын тартуға және тиімді пайдалануға көмектесу, сондай-ақ Қазақстанда жұмыс істеу барысында кездесетін проблемалы мәселелерді шешу тұрғысынан инвесторларға қолдау көрсету болып табылады.