Сал ауруынан баласын емдету үшін ақтөбеліктер квотаны бірнеше жыл күтуге мәжбүр
АҚТӨБЕ. ҚазАқпарат - Сал ауруына шалдыққан балалардың ата-аналары өздерімен тікелей жұмыс істейтін мамандармен бетпе-бет кездесті. Олар жөргек алу, арба, аяқ киім және жылдар бойы кезегі келмейтін квота мәселесін қозғады, деп хабарлайды ҚазАқпарат тілшісі.
Ақтөбе қалалық сал ауруына шалдыққан азаматтарды қолдау орталығына бүгін баласы осы сырқатқа шалдыққан ата-аналар жиналды. Олар бірнеше мәселені билікке жеткізу үшін кездесу ұйымдастырды.
«Екі жыл бұрын ерекше балалардың ата-аналары бірігіп, өзара тәжірибе алмасу үшін топ құрған едік. Қазір 203 адам бар. Олардың көбі Ақтөбеден, он пайызы еліміздің басқа өңірінен тіркеліп отыр. Біз жалғыз жүріп мәселені билікке жеткізе алмаған соң біріктік. Сал ауруына шалдыққан, аутизм, Даун синдромымен ауыратын балалардың ата-аналары атынан бірнеше мәселе қозғаймын. Біріншіден, мүгедек баласы бар ата-аналарға уақытша баспана керек. Кейбір жағдайда күйеуі отбасын тастап кетеді. Жалғызбасты аналар баласының емі үшін алатын жәрдемақысын пәтерге беруге мәжбүр болып отыр. Екіншіден, жылына 700-ден астам жөргек беріледі. Бір күнге екі дана жөргек қажет деп есептеп, қосымша шығынымызды көбейтті. Біз алып жүрген балалар арбасы өте ауыр, ыңғайсыз. Дәрі-дәрмек те уақытылы берілмейді»,- деді кездесуді ұйымдастырушы Гүлсая Ыбыраева.
Ал сал ауруына шалдыққан 8 жастағы Айдостың әкесі Серік Жұмабаев баласына квота ала алмай жүр. Ол 5 жылдан бері оңалту орталықтарына бармағанын айтып отыр.
«Астана қаласындағы оңалту орталығына бару үшін квота кезегіне тұрып, күтіп жүрміз. 2012 жылдан бері «өзіміз хабарласамыз» деп айтады. Балам жылына екі рет облыстық балалар ауруханасына жатады. Ол жерде дәрумен алып, ашуды басатын екпе береді. Ал ауруханадан шыққан кезде ең қажетті деген, сол жерде ішіп, қабылдауы тиіс дәрігердің тізімін жасап, қолымызға ұстатады»,- деді Серік Жұмабаев.
Сал ауруына шалдыққан баланың әкесі невропатолог дәрігердің жұмысына көңілі толмайды. Бұл отбасы Көкшетауға берілетін квотаны алып, ем қабылдауды жөн көреді. «Қыста, жазда мемлекеттік сатып алу мәселесі туындап, кейде дәріні өз қаржымызға сатып аламыз. Бұл біз үшін үлкен шығын. Баланың күтіміне алатын ақшамыздың бәрі дәріге кетіп, кейде жетпей қалады»,- деді ол.
Басшылармен кездесуге екі мүгедек баласы бар Мейрамбек Төлеуов та келді. Туа бітті сал ауруына шалдыққан балалардың бірі бесте, екіншісі 8 жаста. Төлеуовтар отбасы да арба алу, квотамен емделу мәселесін қозғады.
«Пәтер мәселесі - өте өзекті. Пәтер кезегі келгенше уақытша баспана беру ұсынысын әкімдіктегі комиссия қарап жатыр. Ал жөргек беру мәселесі кезінде ата-аналардан ұсыныс түскен соң ҚР Парламент Мәжілісінде отырған депутаттарға хат жолдаймыз. Бұрын осы мәселе оң шешіліп, 48 дана жөргектің орнына 730 жөргек берілді. Ал балалар арбасы туралы ұсыныс мемлекеттік тапсырыс кезінде ескеріледі», - деді Ақтөбе қалалық жұмыспен қамту және әлеуметтік бағдарламалар бөлімінің басшысы Нейлә Бөртебаева.
Айта кетейік, жиынға қатысқан әр ата-ана өз баласының мәселесін айтып, ұсыныстарын тізбектеді. Ал Ақтөбе қалалық сал ауруына шалдыққан азаматтарды қолдау орталығының жетекшісі Құралай Байменова мүгедек бала өз бетімен өмір сүру үшін барлық жағдайды жасауға қол жеткізу жолдарын айтты. Себебі, анасы мен әкесі қартайып, өмірден өткен кезде де баланы мемлекет қарауына қалдыратын мүмкіндік жасалуы керек. Статистикалық мәліметке сүйенсек, қазір облыста 21 мыңнан астам мүгедек бар. Оның 5 мыңнан астамы бала. 
