«Самұрық-Қазына» былтыр 458 млрд теңгенің таза табысын тапты
АСТАНА. ҚазАқпарат -«Самұрық-Қазына» Ұлттық әл-ауқат қоры» АҚ компанияларының 2014 жылғы таза табысы 458 миллиард теңгені құрады. Бүгін ҚР Президенті жанындағы Орталық коммуникациялар қызметінде өткен брифингте мәлім болды.
Қор басшысы Өмірзақ Шөкеевтің айтуынша, жалпы 2014 жылғы жұмыстың қорытындысы жаман болған жоқ.
«Дағдарыс басталған жыл болғанына қарамастан, «Самұрық-Қазынаның» таза табысы 458 млрд теңгені құрады. Бұл ретте Қорға қарасты компаниялар тиімділігінің басты өлшемі саналатын операциялық табыстың көрсеткіші 19,52 пайызды құрады. Тұтастай алғанда Қорға қарасты компаниялар былтырғы жылы жалпы құны 2 млрд 900 млн долларды құрайтын 13 жобаны іске асырды», - деді Өмірзақ Шөкеев.
Оның сөзіне қарағанда, жобаларды жүзеге асыру нәтижесінде 5 мың 600 уақытша және 1 мың 200 тұрақты жұмыс орны құрылған.
