«Самұрық-Қазына» спорттық жобаларды қаржыландыру көлемін елеулі деңгейде қысқартпақ
АСТАНА. ҚазАқпарат - «Самұрық-Қазына» ұлттық әл-ауқат қоры» АҚ спорттық жобаларды қаржыландыру көлемін елеулі деңгейде қысқартпақ. Бұл туралы бүгін Орталық коммуникациялар қызметіндегі баспасөз мәслихатында аталған Қордың басқарушы директоры Дархан Кәлетаев мәлім етті.
«Спорт жобаларына тоқталатын болсақ, әрине, қаржылық қысқарту болады. Дегенмен де, жобалар жабылады деген әңгіме жоқ. Бірақ, өте көп көлемде қысқартулар енгізіліп жатыр»,-деді Д. Кәлетаев.
Осы орайда «Самұрық-Қазына» қорының акционері ҚР Үкіметі болып табылатынын еске салып өткен ол: «Қазіргі кезде Үкімет басшылығымен спорттық жобаларға қандай көлемде қаржы бөлу тұрғысында тиісті талқылаулар жүрігізіп жатыр. Бірақ қомақты көлемде қысқарту болатыны анық»,-деді.
Естеріңізге сала кетейік, Қор бірқатар спорттық жобаларды қаржыландыруға өз үлесін қосуда. Оның аясында «Астана» президенттік кәсіби спорт клубы қамтылған. Клуб - еліміздің танымал спорттық жобаларын, соның ішінде «Астана» велокомандасын, «Астана» футбол клубын, «Astana Arlans» кәсіби бокс клубын, «Барыс» хоккей клубын және басқаларын топтастырған жоба.
