Сан-Ремо жұлдыздары Астанада концерт қояды

АСТАНА. ҚазАқпарат  - Сан-Ремо фестивалі арқылы әлемге танылған италиялық әншілер елордаға келеді. Бұл туралы бүгін Астана әкімдігінде Мәдениет басқармасының басшысы Болат Мажағұлов мәлім етті, деп xабарлайды ҚазАқпарат.

"Астанада 15 шілде күні Италияның  музыкасын сүйіп тыңдайтын тыңдармандар үшін "Сан-Ремо жұлдыздары Астанада" атты фестиваль өтеді. Сан-Ремо фестивалі - әлемге әйгілі ән конкурсы. Астанадағы концертте өнер көрсету үшін Италиядан әншілер арнайы келмек", - деді Б. Мажағұлов.

Сонымен қатар маусым айының үшінші жартысында "Бәйтерек" монументі алдында қазіргі заманғы этникалық музыканың "TheSpiritofAstana" атты фестивалі өтеді. Концертке қатысу үшін Африка, АҚШ, Македония, Грузия, Венгрия, Ресей, Қазақстан, Башқұртстан, Бурятия және Тувадан музыкалық топтар шақырылды. Астана күнін тойлау қазақстандық экстрада жұлдыздарының концертімен бастау алмақ. Астананың концерттік залдарында "Музарт", "Дервиши" топтарының концерттері өтеді. Сонымен бірге Секен Тұрысбек пен Алтынбек Қоразбаевтың жеке кештері ұйымдастырылады.