Санавиация орталығының бюджет қаражаттарын пайдалануы заңдылығы тексеріледі
АСТАНА. ҚазАқпарат - Тікұшақ құлағаннан кейін Санавиация орталығының бюджет қаражаттарының пайдалануы заңдылығы тексеріледі Бұл туралы ҚР Бас көлік прокуратурасыныің баспасөз қызметі хабарлады.
2016 жылдың 27 қаңтары күні сағат 16:55 шамасында Алматы облысында MD-600N тікұшағы апатқа ұшырап, оның салдарынан 5 адам қаза тапқан (1 ұшқыш және 4 жолаушы, оның ішінде 1 кәмелетке толмаған бала).
Тікұшақтың ұшуы 2015 жылғы 30 желтоқсанда әуе-көлік қызметтерін көрсету туралы жасалған шарттың шеңберінде «Республикалық санитариялық авиация орталығы» РМК-ның өтінімі бойынша «Аспан» әуекомпаниясы» АҚ-ның пайдалануындағы әуе кемесімен жүзеге асырылған.
Аталған факт Үштөбе стансасындағы Желілік полиция бөлімінің Сотқа дейінгі тергеп-тексерулердің бірыңғай тізілімінде ағымдағы жылғы 27 қаңтарда Қылмыстық кодекстің 344-бабы бойынша тіркелді (темiржол, әуе, теңiз немесе өзен көлiгi жүрісі немесе оларды пайдалану қауіпсіздігі қағидаларын бұзу).
Қазіргі уақытта Қазақстан Республикасы Бас Прокурорының тапсырмасы бойынша сотқа дейінгі тергеп-тексеру материалы Қазақстан Республикасы Бас көлік прокуратурасының арнайы прокурорының өндірісіне қабылданды.
Сонымен қатар «Республикалық санитариялық авиация орталығы» РМК-нің бюджеттік қаражатты пайдалануы және әуе-көлік қызметтерін көрсету заңдылығын сақтауына тексерістер тағайындалды.
