Санкт-Петербургте коронавирусқа қатысты шектеулер 6 жылдан кейін алынды
МӘСКЕУ. KAZINFORM - 2020 жылғы наурызда енгізілген COVID-19 таралуына қарсы іс-шаралар туралы қала билігінің қаулысы 2026 жылғы 1 қазаннан бастап күшін жояды, деп хабарлайды агенттік тілшісі.
Құжатты жою туралы шешім өңірдегі эпидемиологиялық жағдайдың тұрақтануына байланысты қабылданды. Тиісті нұсқаманы Санкт-Петербург пен Ленинград облысы бойынша бас мемлекеттік санитарлық дәрігер шығарды.
Негізгі қаулымен бірге оған кейін енгізілген өзгерістер мен толықтырулар да күшін жояды.
Алты жылдан астам уақыт бойы қолданыста болған құжат әр кезеңде коронавирус инфекциясының таралуының алдын алу шараларын реттеді. Оның ішінде бұқаралық іс-шараларды өткізуге, қоғамдық тамақтану орындары мен сауда нысандарының жұмысына қойылатын талаптар, сондай-ақ басқа да санитарлық-эпидемиологиялық шектеулер қамтылды.
Сонымен қатар қаулыда көзделген шектеу шараларының басым бөлігі бұған дейін жойылған болатын. Құжаттың күші формалды түрде 2026 жылдың күзіне дейін сақталды.
Айта кетейік, Қазақстанда коронавирус жұқтыру дерегі 16 есе азайды.
