Санкт-Петербургтегі терактіге байланысты Қазақстанда қауіпсіздік шаралары күшейтілді
АСТАНА. ҚазАқпарат - ҚР Ұлттық қауіпсіздік комитеті Санкт-Петербургтегі терактіге байланысты қауіпсіздікті күшейтті, деп хабарлайды ҚазАқпарат.
Бұл туралы бүгін Үкімет отырысынан соң тілшілерге берген сұхбатында Ұлттық қауіпсіздің комитеті төрағасының орынбасары Нұрғали Білісбеков мәлім етті.
«Мен жаңа Үкімет отырысында Санкт-Петербургттегі қайғылы оқиға туралы ақпарат жетісімен біз барлық Ұлттық қауіпсіздік департаменттеріне және республика аумағындағы барлық күштік құрылымдарға көлік объектілерінде қауіпсіздік шараларын күшейту жөнінде тапсырма бергенімізді баяндаған болатынмын», - деді ол Үкімет отырысынан кейін тілшілерге берген сұхбатында.
Оның сөзінше, Қазақстанның мемлекеттік шекарасында тексеріс режімі қатаңдатылып отыр.
«Әрине, шекарада тексерістер күшейтіледі, Алматы метрополитенінде, көлік нысандары, шекарадағы өткізу бекетттері - барлығында қауіпсіздік шаралары қатаңдатылады. Біз кез келген ақпаратты жедел тексеру шараларын қолға алдық», - деді ҚР ҰҚК басшысының орынбасары.
Н.Білісбеков Ресейдің Федералды қауіпсіздік қызметімен арадағы бірлескен жұмыстарға да тоқталды. Сонымен қатар ол Санкт-Петербургтегі терактіге қазақстандық азамат Максим Арышевтің қатысы бар болуы мүмкін деген ақпаратты жоққа шығарды.
Еске сала кетейік, 3 сәуірде Санкт-Петербург метросында болған жарылыстан 11 адам қаза тауып, 45 адам жарақаттанған болатын.
