Сарапшы: Қазақстандықтарға отандық тауарларды тұтыну қажет

АСТАНА. ҚазАқпарат - Қазақстан өңірлері Президент Нұрсұлтан Назарбаевтың «Қазақстан жаңа жаһандық нақты ахуалда: өсім, реформалар, даму» атты Қазақстан халқына Жолдауын ерекше қошаметпен қарсы алды. Бұл туралы бүгін Орталық коммуникациялар қызметінде өткен баспасөз мәслихатында Қазақстан Республикасының Тұңғыш Президенті - Елбасы кітапханасы стратегиялық зерттеулер және жоспарлау қызметінің басшысы Михаил Мироненко мәлім етті.

«Қазақстанның аймақтарында адамдар Президенттің биылғы Жолдауын ерекше көңілмен қабыл алды. Бұл Жолдауда Президент нақты міндеттер мен мақсаттарды алдымызға қойды», - дейді ол.

Оның сөзі бойынша, экономиканы бүгін әрбір азамат отандық әлеуметтік жауапкершілік арқылы қолдауы тиіс. Отандық тауарларды тұтыну арқылы, сырттан келетін импорттық тауарлардың азаюына ықпал жасайды.

«Жаңа экономикалық ахуал Армагеддон емес, Жапония дағдарысты 20 жыл бойы кешіп келеді, дегенмен өсім көрсетуде. Бізге дамуға қажеттінің барлығы бар, тек жатыпішерліктен арылуымыз керек. «Лексус 570» көлігінің құны бірнеше жұмыс орнын қамтамасыз ететін шағын өндірістің құнымен тең екенін түсінуіміз қажет. «Мемлекет, көмегің қайда» дейтін уақыт аяқталғанын баяғыда-ақ ұғынатын кез келген. Мемлекетке отбасыңдай қарау керек», - деп атап өтті сарапшы.