Сәрсенбіде елдің басым өңірінде күшті бұрқасын мен ұйытқыма жел күтілуде - Қазгидромет
АСТАНА. 28 желтоқсан. ҚазАқпарат - «Қазгидрометтің» болжауынша, сәрсенбі, 28 қараша күні Қазақстанның дерлік барлық аумағы циклонның ықпалында болады, онымен елдің басым өңірінде қар, бұрқасын мен жел күтілуде.
Атап айтқанда, Батыс Қазақстан, Атырау, Ақтөбе, Қостанай, Ақмола, Қарағанды, Қызылорда облыстарында секундына 15-20 метр күшпен соғатын желдің екпіні кей уақыттары 25 метрге жетіп, бұрқасын соғуы ықтимал. Ақтөбе облысында күндіз бұрқасынның күші қатты болады.
Павлодар облысында 15-22 м/с жылдамдықпен соғатын желдің күші 27 м/с-қа жетіп, оған қатты бұрқасын қосылады.
Шығыс Қазақстан облысының жекелеген аумақтарында сондай-ақ, бұрқасын мен жел күтілуде, оның екпіні секундына 15-20 метрді құрайды.
Маңғыстау облысының кей өңірлерін тұман басып, 17-22 м/с жылдамдықпен жел соғады.
Оңтүстік Қазақстан және Жамбыл облыстарының кейбір аумақтарында тұман, көктайғақ, 15-22 м/с екпіндегі жел күтілуде.
Алматы облысын кей уақыттары тұман басады, түнде Жалаңашкөл аумағында желдің күші 18-23 м/с-ты құрайды.
