Satbayev университеті ғалымдарының өнертабысы жылына 100 млн доллар табыс әкелуі мүмкін

АСТАНА. KAZINFORM — Ғылым және жоғары білім министрі Саясат Нұрбек Үкімет отырысынан кейін өткен баспасөз мәслихатында Satbayev университетінің технологиясымен тазартылған селенді таныстырды. 

— Satbayev University-дің Алматыдағы Металлургия және кен байыту институты мен Балқаштағы «Қазақмыс-Прогресс» мыс балқыту зауыты былтыр цех ашқан болатын. Жыл басында тұңғыш партиясы 99,5 пайыз тазалығымен экспортқа шықты. Таза табыс 1,3 миллиард теңге болды. Енді осы кіп-кішкентай цех жылына 100 миллион долларға дейін арнайы тазартылған селенді сатады. «Қазцинк», «ҚазАтомӨнеркәсіп» сияқты үлкен компаниялардың селен байыту қалдықтарынан рафинатталған (тазартылған) селен шығаруға мүмкіндік болады. Ақша табуды бастадық. Бір жылдың көлемінде экспорт әлеуетімізді күшейтеміз, — деді Ғылым және жоғары білім министрі. 

Бұған дейін хабарланғандай, Оңтүстік Корея аталған институт базасында бірлескен зерттеу институтын құруға 16 млн доллар бөлмекші.