Сауд Арабиясының ірі мұнай құбырына пилотсыз ұшу аппараттары шабуыл жасады
НҰР-СҰЛТАН. ҚазАқпарат - Сауд Арабиясындағы орталық мұнай құбырына пилотсыз авиация шабуылдады. Бұл туралы сейсенбі күні корольдіктің энергетика, өнеркәсіп және минералдық ресурстар министрі Халед аль-Фалех мәлімдеді, деп хабарлайды ҚазАқпарат Al Mayadeen телеарнасына сілтеме жасап.
«Корольдіктің батысынан шығысына мұнай тасымалдайтын мұнай құбырына мина қойылған пилотсыз ұшақтар шабуылдады. Saudi Aramco ұлттық компаниясы «Шығыс-Батыс» мұнай құбырының жұмысын тоқтатты», - деген министрдің сөзін келтіреді Al Mayadeen телеарнасы.
Халед аль-Фалех бұл істің артында кім тұрғанын нақтылаған жоқ.
Министрдің сөзінше, жергілікті уақытпен 06:00 - 06:30 аралығында пилотсыз басқарылатын аппараттар құбыр желісінің екі сорғы стнасасына шабуылдаған. Бұл арқылы мұнай кен орындарынан корольдіктің шығысындағы Янбу портты қаласына мұнай тасымалданады. Шабуыл салдарынан өрт шығып, №8 станса зақымдалған.
