Сауда министрлігі Трамптың жаңа баж салығына қатысты мәлімдеме жасады
АСТАНА. KAZINFORM – Қазақстан Республикасы Сауда және интеграция министрлігінің АҚШ-тың бірқатар тауарға жаңа кедендік баждар енгізуіне қатысты мәлімдемесі жарияланды.
– АҚШ тарапынан қабылданған жаңа сауда шараларын алдын ала талдау нәтижесінде, Қазақстаннан АҚШ-қа экспортталатын тауарларының елеулі бөлігіне қосымша тарифтердің әсері болмайтыны анықталды. Өйткені олар АҚШ әкімшілігінің нормативтік актілерінде көзделген ерекшеліктер тізіміне енгізілген, - деп жазылған хабарламада.
Қазақстан Республикасының Ұлттық статистика бюросының мәліметтері бойынша, 2024 жылдың нәтижесі бойынша Қазақстан мен АҚШ арасындағы тауар айналымы 4,2 млрд АҚШ долларын құрады, бұл өткен жылмен салыстырғанда 4%-ға артық (4,1 млрд АҚШ доллары). Қазақстанның АҚШ-қа экспорт көлемі 2024 жылы 30,6%-ға артып, 2,0 млрд АҚШ долларын құрады. АҚШ-тан Қазақстанға импорт көлемі 2,2 млрд АҚШ доллары болды.
– Қазақстанның АҚШ-қа экспорт құрылымында негізгі орын алатын тауарлар — шикі мұнай, уран, күміс, ферросплавтар және басқа да тауарлар. Бұл санаттағы өнімдер АҚШ Президентінің «Тауарлар саудасындағы маңызды және тұрақты тапшылықты жою мақсатында өзара тарифтер арқылы импортты реттеу туралы» Жарлығы бойынша ерекшеліктер тізіміне енгізілген тауарлардың 92%-ын құрайды, - делінген Сауда министрлігінің мәлімдемесінде.
Қосымша баждар белгілі бір тауар топтарына қатысты енгізілетін болады. Бұл санаттағы тауарлардың экспорт көлемі былтыр 95,2 млн АҚШ долларын құрады. Олардың ішінде — фосфор (2024 жылы экспорт көлемі 15,9 млн АҚШ доллары), ферросилиций (12,7 млн АҚШ доллары), линзалар (4,1 млн АҚШ доллары), бидай клейковинасы (4 млн АҚШ доллары), аммоний нитраты (2,4 млн АҚШ доллары).
Қабылданған тарифтік шаралар Қазақстанның АҚШ-қа жалпы экспортының тек 4,8%-ына ғана әсер етеді. Үкімет Қазақстанға қатысты қосымша баждарды қолданбау мүмкіндігін талқылау үшін АҚШ тарапымен консультациялар жүргізуге ниетті.
– Қазақстан Республикасы 10 жыл бойы Дүниежүзілік сауда ұйымының (ДСҰ) мүшесі болып келеді және сыртқы сауда саясатын жүзеге асыруда ұйымның принциптерін қатаң ұстанады. АҚШ-пен екіжақты ынтымақтастық аясында Қазақстан халықаралық міндеттемелерге сәйкес саудада тең және кемсітушілікке жол бермейтін жағдайларды қамтамасыз етеді, - делінген ведомствада.
Еске сала кетейік, бұған дейін Трамп мемлекеттерге барлық саланы қамтитын баж салығын енгізуді жоспарлап отырғанын жазған едік.
